الرئيسية / ثقافة وفنون / وهمة اعتقال الصادق المهدي

وهمة اعتقال الصادق المهدي

شليل وين راح 
شالو الصادق المهدي وانداح

بدلوا الترابي بالصادق المداح
ما ابو النسب و فردة غطاي قداح
ما نفس الكمونية والويكة والملاح

لعبة كراسي وفذلكة ولفت انتباه
وهمة وكدة والناس لو نصاح
 
معتقل خمس نجوم ورستكة وارتياح
جنات عدن وسهرات وليال ملاح

فيها ما تشتهي الأنفس وكل المباح
سجين ومسجون يسامرون للصباح
ليالي السمر واستشارات وانشراح

حركات جيش وحنك واستنكاح
والكل نايم وما عارفين الصاح 

تبادل مراكز ونقاهة والناس ترن تاح
وخليكم انتو فرجة واندهاش وصياح

فاكرنو مسجون والله ده الجنون
طيب ما ولدو نائب ابو القانون

اصلا لما كتمت وحبكت وقربت تكون
قالوا يلا نشغلا للدقوس تاح تراح

ودي فكرة الثعلب بعد فكوه وارتاح
اصلها باصات ون تو ولعبوها صاح 

والجنجويد في الخرطوم لقوا براح 
بالوهمة دي ما الصادق لعب جناح

وبرروا دخلتن وتاني يا معين يا فتاح
بقت إقطاعية و وكالة بباب ومفتاح
 
وكدا يهرشوكم ما المهدي ومسجون
رغم ابنه في القصر فما بال الآخرون 

والمساكين ديل كيف حالهم ح يكون
بوجود حمديتي وجنجويد المنون

وبكدا تبقوا دوام بر الشبكة وساهرون
نكات فيسبوك وفرجة لا ثورة ولا يحزنون 
 
وخليكم في الواتساب مع ندى راستا
والدابي و ود الحافظ والهالكون

منعول ابو الفهم والجبنة والكمون
اذا ما ليها طعم ولا لون ولا قانون
——————-
كمال الدين مصطفى
 Atron89@yahoo.com 

اضف رد

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.